【鞍山遊記】疫下後山遊青蛙石

作者: 展超
喜愛到馬鞍山及周邊地區閒遊，享受大自然

• 

• 

日期: 二零二零年三月廿二日

早一日天陰陰咁，點諗到今日咁好天？咁好太陽，冇理由唔出去抖吓氣啫，近近地我後山唔多人行，上去坐吓、吹吓風、嘆吓茶，一坐就個幾鐘。呢條路線相對簡單而且路程唔長，又夠就腳，最好係唔太多人會行，唔駛人山人海，有位可以抖吓氣。

馬鐵大水坑站 B 出口，樓梯上返地面，一直向前行就會見到路線起點。

雖然呢條路唔係正式行山徑，不過其實不時都有人行，所以路線亦好清晰。其實山上嘅路有好多，大同小異啦，唔少都係殊途同歸，上山就唔會有分叉，跟住條路行就得。高低落差唔多，唔駛用手嘅。

• 

• 

• 

由馬鐵站起步計，都係十分鐘、650米路程，已經上到一個石平台位，呢度可以望返落去下面富安花園、大水坑、錦泰苑、曉峰灣畔一帶，好開揚。上多少少會見到條標高柱，呢度山友叫做「半坳嶺」，又係風景位。望過對面嘅鹿巢山，個多月前嘅山火，燒到黑晒。

• 

• 

• 

半坳嶺之後嘅路更加明顯，而且斜度變化唔多，輕輕鬆鬆行多少少，就會見到青蛙石。

• 

• 

過咗青蛙石上多一後路，風景更覺開揚，搵個大石台位休息一下，吹吹涼風，洗卻一身悶氣。

• 

好風光，不妨稍作停留，飲返啖茶，打發吓時間，反正路程唔長大把時間。坐到夠，再開始上山。

• 

• 

• 

其實都係行多十分鐘唔夠，就已經接入水泥路，開始聽到煩囂嘅人聲。沿梯級落去，就已經係馬鞍山燒烤場。而家假日，真係山上面隨時人多過商場，所以印係不作逗留，沿車路落山。呢條良友路當然係零難度啦，係小心避車囉。

• 

• 

其實最悶就係行車路，好彩人唔算多，慢慢行散步落山。行行吓會見到左面有一個石拱門，據說係舊時礦場吊車設施嘅一部份。呢個位有條小路，係晨運客開僻嘅捷徑，可以由呢度落返去恆安邨、大水坑，唔算太難，總好過繼續行車路。不過喺度落去之前，我就喺附近轉入另一個位，尋訪昔日礦場一個遺址，礦洞出口。呢個出口位於海拔110米，舊時開採咗嘅鐵礦石，就係由呢度用礦車運落去海邊，送去日本。

• 

• 

• 

• 

由晨運徑落去，兩分鐘唔駛就落到水泥路。會見到一啲設施，據講係舊時選石廠嘅遺址。沿水泥路行，就可以出返去馬鞍山繞道，一路行就會返到上山時嘅水務署路口。

• 

• 

• 

轉自原文： http://hikingshare.byethost22.com/frogrock/frogrock.html
(編者按: 原文標題為”青蛙石”)

馬鞍山社區動力不時邀請區內街坊，就自己有興趣的題目撰寫文章，藉以推廣健康生活及環保社區慨念。歡迎投稿。