作者: 彭利池
簡介: 作者諸事八卦，外形似人其實係一條八爪魚， 又係保險人又係演員又係配音員又係導演，常常熱血過籠不過心地善良😎
頭啖湯， 尾班車
我就絕對唔係教大家煲湯， 而係想同大家講一講喺3月31日前最後一個星期有冇一啲可以慳稅嘅方法， 錢喺自己銀包好過俾庫房啦係咪😆
市面而家首次有3款理財產品可扣稅，正確應該係話增加免稅額，可扣稅產品包括「自願醫保」、「延期年金」、及「MPF自願性供款」
自願醫保最多扣稅額為8,000元，以最高稅階計，即最多可節省1,360元；其餘兩者合共扣稅額為60,000元，即最多可節省10,200元。
「自願醫保」顧名思義就係住院醫療計劃啦， 雖然上限扣稅額係8,000元， 但例如一位40歲非吸煙男士， 自願醫保每年嘅保費大約係4,500元左右， 咁即使投保，佢嘅免稅額係4,500元， 不過政府容許你可以攞埋你屋企人嘅自願醫保呢當免稅額， 例如幫父母，兄弟姐妹，配偶或子女投保，佢哋嘅保費可以加落去你嘅免稅額度， 不過上限都係8,000元免稅額， 如果以最高稅階去計算可慳到嘅稅最多係1,360蚊。
「延期年金」的話， 即係而家可能投保一個五年或者十年嘅計劃， 當筆錢滾存之後退休嘅時候每個月攞返，投保延期年金嘅話， 最高嘅免稅額係60,000蚊， 即係每年要投保落個計劃係60,000元，同樣以最高稅階去計算最多可慳嘅稅係10,200元。
「MPF自願性供款」， 呢個戶口同我哋本來供嘅mpf係分開嘅， 呢個戶口同延期年金一樣最高免稅額係60,000元 ( 延期年金 + MPF自願性供款夾埋最高係60,000元)， 即係每年攞60,000元出嚟擺落呢一個MPF自願性供款嘅戶口，咁就會多60,000嘅免稅額， 而呢一個戶口裏面嘅錢， 要提取嘅話係同MPF嘅規例一樣。
大家記住如果要申請以上嘅幾樣產品， 而又想喺今個稅季年度(2019/2020) 可以行駛到個免稅額， 喺3月27號之前就要向有關金融機構申請， 過咗都可以申請不過就只能再下一個稅季年度(2020/2021) 先至可以扣稅喇， 所以大家想慳稅嘅話就要趕呢架尾班車啦🏃♂
以上文章為街坊投稿，文章內容只供參考，不代表本會立場。
有關稅務/保險/強積金/年金相關詳情，請尋求專業人士意見。
馬鞍山社區動力不時邀請區內街坊，就自己有興趣的題目撰寫文章，藉以推廣健康生活及環保社區慨念。歡迎投稿。
